«Соңғы қоңырау» — мектеппен қимастыққа толы қоштасу
11-сынып түлектері үшін ең толқытатын әрі ерекше сәттердің бірі — «Соңғы қоңырау» мерекесі өтті. Бұл күн жай ғана мектеп мерекесі емес, балалық шақ пен үлкен өмірдің арасындағы маңызды белес болды.
Салтанатты жиынға оқушылар, ұстаздар, ата-аналар және қонақтар қатысты. Мерекелік безендірілген залда ұстаздарға арналған жүрекжарды алғыс сөздер айтылды. Көптеген жылдар бойы шәкірттеріне білім беріп, қолдау көрсетіп, қиындықтарды бірге еңсерген педагогтарға ерекше құрмет көрсетілді.
Түлектер ән айтып, би билеп, мектеп өмірінен көріністер ұсынды. Әсіресе сынып жетекшілері мен ата-аналарға арналған алғыс сөздері көпшіліктің көңілін толқытып, көздерге жас үйірді. Мектептегі жарқын сәттер еске алынды.
Түлектерге ізгі тілектерін арнаған мектеп әкімшілігі оларға емтихандарды сәтті тапсырып, мақсаттарына нық қадаммен жетулеріне және туған мектептерін ешқашан ұмытпауына тілектестік білдірді. Мектеп жылдары бойы оқушылардың жанынан табылған ұстаздар мен мектеп әкімшілігіне ерекше алғыс айтылды.
Құттықтау сөз сөйлегендер:
мектеп директоры Аманжолов Б.С.,
40 жылдан астам еңбек өтілі бар педагогика ардагері, Астрахан орта мектебінде 20 жылдан астам қызмет атқарған Сүлейменов Жылқыбай Нұраханұлы,
Астрахан ауылдық округінің әкімі Кокорская Т.В.,
Астрахан ауылдық округінің депутаты Магуянов Марат Амантаевич,
Қаратомар ауылдық округі Аналар кеңесінің төрайымы Сарсенова Майнаш Қабызейітқызы,
Астрахан ауылдық округі Ардагерлер кеңесінің төрайымы Попова Т.Л.,
педагогика ардагері Нурушова Ләззат Нұрмахамбетқызы,
алғашқы ұстаздар Нұрмағамбетова Клара Нұрмағамбетқызы мен Нурушова Гүлүм Конкабайқызы,
11-сыныптың сынып жетекшісі Рудь Елена Александровна.
Білім алушыларды қорытынды аттестаттауға жіберу туралы бұйрықпен директордың оқу ісі жөніндегі орынбасары Джуасбаев Б.Д. таныстырды.
Мектептің ең кішкентай бүлдіршіндері — бірінші сынып оқушылары толқыныс пен қуанышқа толы көңіл-күймен түлектерді қарсы алып, құттықтады. Олар да кезінде дәл осылай қолдарына гүл ұстап, үлкен армандармен мектеп табалдырығын алғаш аттаған еді.
Мерекенің шарықтау шегі — дәстүрлі соңғы қоңырау болды. Оны 11-сынып түлегі Айтбаев Дархан мен 1-сынып оқушысы Қабылкина Регина соқты.
Мектеп вальсінің әуенімен түлектер әсем би билеп, кейін арман-тілектерін тілеп, көкке түрлі-түсті шарлар ұшырды.
«Соңғы қоңырау» мерекесі барлық қатысушылардың жүрегінде жылы естелік, қуаныш пен қимастық сезімін қалдырды. Алда түлектерді жаңа жолдар, маңызды шешімдер мен үлкен мүмкіндіктер күтіп тұр. Бірақ мектептегі бақытты жылдар олардың өміріндегі ең жарқын беттердің бірі болып мәңгі есте қалмақ.
